വിചിത്രജീവി ഇറ്റലിയിലെ പള്ളിയിൽ പ്രത്യക്ഷപ്പെട്ടു എന്ന പ്രചരണം തെറ്റാണ്

അന്തർദേശിയ൦ കൗതുകം ദേശീയം

വിവരണം 

കോവിഡ് 19 മഹാമാരിയായി ലോക രാജ്യങ്ങളിൽ പടരുമ്പോൾ ചിലർ ഇതിനെ ലോകാവസാനമായി വ്യാഖ്യാനിക്കുന്നു. അത്തരത്തിൽ നിരവധി ആശയങ്ങൾ ചിലർ  സാമൂഹ്യ മാധ്യമങ്ങളിലൂടെ പങ്കുവയ്ക്കുന്നത് വായനക്കാർ കണ്ടിട്ടുണ്ടാകും. അത്തരത്തിൽ പ്രചരിക്കുന്ന ഒരു പോസ്റ്റ് ഇതാ : പക്ഷിയെപ്പോലെയുള്ള ഒരു ജന്തു ഇറ്റലിയിലെ italy പള്ളിയിൽ പ്രത്യക്ഷപ്പെട്ടു. അത്തരമൊരു സൃഷ്ടിയെ ഇന്നുവരെ കണ്ടിട്ടില്ല. ഈ സമയത്ത് ലോകത്ത് വളരെ വിചിത്രമായ കാര്യങ്ങൾ നടക്കുന്നു.” ഈ വിവരണത്തോടെ ഒരു വീഡിയോ ആണ് പോസ്റ്റിലുള്ളത്. മനുഷ്യ ശരീരത്തിന് സമാനമായ രൂപവും നീണ്ട ചിറകുകളുമുള്ള ഒരു അപൂർവ ജീവി പള്ളിയുടെ മുകളിലെ മകുടത്തിലേക്ക് പിടിച്ചു കയറുന്നതും അവിടെ നിന്നും പറന്നുയരുന്നതുമായ ദൃശ്യങ്ങളുള്ള വീഡിയോയ്ക്ക് 45 സെക്കന്റ് ദൈർഘ്യമാണുള്ളത്. നിരവധിപ്പേര്‍ ഈ വീഡിയോ സാമൂഹിക മാധ്യമങ്ങളില്‍ പങ്കുവയ്ക്കുന്നുണ്ട്.

archived linkFB post

ദൃശ്യങ്ങളിൽ കാണുന്ന വിചിത്ര ജീവി എന്താണെന്ന് നമുക്ക് അന്വേഷിച്ചു നോക്കാം 

വസ്തുതാ വിശകലനം 

ഈ വീഡിയോ കീ ഫ്രയിമുകളായി വിഭജിച്ചശേഷം അതിൽ പ്രധാനപ്പെട്ട ഒരെണ്ണത്തിന്‍റെ റിവേഴ്‌സ് ഇമേജ് അന്വേഷണം നടത്തി നോക്കിയപ്പോൾ ഈ വീഡിയോയുമായി ബന്ധപ്പെട്ട ചില വസ്തുതതകൾ ലഭിച്ചു. വീഡിയോയിൽ JJPD Producciones എന്ന എബ്ലം കാണാം. അവർ വിനോദത്തിനായി ‘അപൂർവജീവി’കളുടെ ദൃശ്യങ്ങൾ സ്ഥിരമായി പ്രസിദ്ധീകരിക്കുന്ന സംഘമാണ്. ഇതേ വീഡിയോയുടെ ദൃശ്യങ്ങളും ഈ അപൂര്‍വ ജീവിയുടെ ആനിമേഷന്‍ ചിത്രീകരണവും അവർ 2019 സെപ്റ്റംബർ 9 നു അവരുടെ യൂട്യൂബ് ചാനലിൽ ആറ് മിനിറ്റ് ദൈർഘ്യമുള്ള വീഡിയോയില്‍ നല്‍കിയിട്ടുണ്ട്. ഈ ജീവി ത്രീഡി അനിമേഷനാണ്. 

ഇതുപോലെ മറ്റുചില അപൂർവ വീഡിയോകളും അവരുടെ ചാനലിൽ കാണാം. 

archived link

സ്പാനിഷ് ഭാഷയിൽ നൽകിയിരിക്കുന്ന വിവരണത്തിന്‍റെ പരിഭാഷ ഇങ്ങനെയാണ്: നിക്കരാഗ്വയിലെ ഗ്രാനഡ കത്തീഡ്രലിൽ ഭയപ്പെടുത്തുന്ന ഭൂതം. സ്പെയിനിൽ യഥാർത്ഥ പിശാചിനെ കണ്ടോ? വിവരണം വായിക്കുക. ജെജെപിഡി പ്രൊഡക്ഷൻസ്: വിനോദത്തിനായി ഞങ്ങൾ സൃഷ്ടിച്ച അസാധാരണ വീഡിയോകളാണ് ഇവ. കാണിച്ചിരിക്കുന്ന എല്ലാ ചിത്രങ്ങളും ഫിക്ഷനാണ്. സി‌ജി‌ഐ വീഡിയോ (കമ്പ്യൂട്ടർ‌ ജനറേറ്റുചെയ്‌ത ചിത്രം) ഗാർ‌ഗോയിലിൻറെ സൃഷ്ടി അനിമേഷനാണ്.

ഈ വീഡിയോ ദൃശ്യങ്ങൾ ഇറ്റലിയിലെ പള്ളിയിൽ കാണപ്പെട്ട അപൂർവ ജീവിയുടേതല്ല. വിനോദത്തിനായി നിർമ്മിച്ച ഒരു പ്രാങ്ക് വീഡിയോയിലെ ദൃശ്യങ്ങളാണിത്. അപൂര്‍വ ജീവിയെ അനിമേഷനിലൂടെ സൃഷ്ടിച്ചതാണ്.

നിഗമനം 

ഈ പോസ്റ്റിൽ നൽകിയിരിക്കുന്ന വാർത്ത പൂർണ്ണമായും തെറ്റാണ്. വീഡിയോയിലെ ദൃശ്യങ്ങൾ ഇറ്റലിയിലെ പള്ളിയിൽ കാണപ്പെട്ട അപൂർവ ജീവിയുടേതല്ല. നിക്കാരഗ്വേയിൽ ചിത്രീകരിച്ച ഒരു പ്രാങ്ക് വീഡിയോ ദൃശ്യങ്ങളാണിത് എന്ന് വീഡിയോയുടെ നിർമാതാക്കൾ തന്നെ വിവരണം നൽകിയിട്ടുണ്ട്. 

Avatar

Title:വിചിത്രജീവി ഇറ്റലിയിലെ പള്ളിയിൽ പ്രത്യക്ഷപ്പെട്ടു എന്ന പ്രചരണം തെറ്റാണ്

Fact Check By: Vasuki S 

Result: False