പച്ചക്കറികളില്‍ വിഷം നേരിട്ട് കുത്തിവയ്ക്കുന്നു… പ്രചരിക്കുന്നത്   സ്ക്രിപ്റ്റഡ് ദൃശ്യങ്ങളാണ്…

നിത്യോപയോഗത്തിന് കൃഷി ചെയ്യുന്ന പച്ചക്കറികളില്‍ കീടബാധയേല്‍ക്കാതിരിക്കാന്‍ വിഷം തളിക്കുന്നത് ആശങ്കയുണ്ടാക്കുന്ന കാര്യമാണ്. പച്ചക്കറി വിളയില്‍ വിഷം നേരിട്ട് കുത്തിവയ്ക്കുന്ന ഏതാനും ചെറുപ്പക്കാരുടെ വീഡിയോ സാമൂഹ്യ മാധ്യമങ്ങളില്‍ വൈറലാകുന്നുണ്ട്. 

പ്രചരണം 

വിളകളിലേയ്ക്ക് നേരിട്ട് കുത്തിവയ്പ് നൽകി പച്ചക്കറി കൃഷി ചെയ്യാൻ ശ്രമിക്കുന്ന ചിലരെ ഈ വീഡിയോയിൽ കാണാം. വീഡിയോ ചിത്രീകരിക്കുന്നയാള്‍ ഈ കർഷകരോട് എന്തു മരുന്നാണ്, എന്തിനാണ് തളിക്കുന്നത് എന്നു ചോദിച്ചപ്പോൾ അവർ വളരെ പ്രക്ഷുബ്ധരായി പ്രതികരിക്കുന്നത് കാണാം. വീഡിയോയുടെ ഒപ്പം മുന്നറിയിപ്പ് സന്ദേശമുണ്ട്: “വിഷം തളിക്കലല്ല, നേരിട്ട് സിറിഞ്ച് വച്ച് കുത്തി കയറ്റുകയാണ്…. 🤔 🙄 😳

കഴുകിയതു കൊണ്ടൊന്നും ഒരു കാര്യവുമില്ല …..😥”

FB post

archived link

എന്നാല്‍ ഇത് യഥാര്‍ത്ഥ സംഭവമല്ലെന്നും ചിത്രീകരിച്ച വീഡിയോ ആണെന്നും അന്വേഷണത്തില്‍ ഞങ്ങള്‍ കണ്ടെത്തി. 

വസ്തുത ഇതാണ് 

ഫെയ്‌സ്ബുക്കിലും യൂട്യൂബിലും വ്യത്യസ്ത കീവേഡുകൾ ഉപയോഗിച്ച് വീഡിയോയുടെ വിശദാംശങ്ങള്‍ തിരഞ്ഞ് ഞങ്ങൾ അന്വേഷണം ആരംഭിച്ചു. ഇതേ വീഡിയോ 2023 സെപ്‌റ്റംബർ 2-ന് ഫെയ്‌സ്ബുക്കിൽ അപ്‌ലോഡ് ചെയ്‌തതായി കണ്ടെത്തി. ഫാത്തിമ ബൊണാറ്റോ എന്ന ഒരു ഫേസ്ബുക്ക് പേജിലാണ് ഈ വീഡിയോയുടെ ദൈർഘ്യമേറിയ പതിപ്പ് അപ്‌ലോഡ് ചെയ്തിട്ടുള്ളത്. അടിക്കുറിപ്പ് ഇങ്ങനെ: “പച്ചക്കറി വളര്‍ത്തുന്ന മരുന്ന് പ്രയോഗിച്ച് നിങ്ങൾ നിങ്ങളുടെ ആരോഗ്യവുമായി കളിക്കുകയാണ്. നിരാകരണം:-സുഹൃത്തുക്കളേ, ഈ വീഡിയോ ബോധവൽക്കരണത്തിന് വേണ്ടി മാത്രമാണ് നിർമ്മിച്ചിരിക്കുന്നത്, ദയവായി വീഡിയോ ഗൗരവമായി എടുക്കരുത്. നന്ദി”

ഈ വീഡിയോ 3 മിനിറ്റ് 41 സെക്കൻഡ് ആണ്. വൈറലായ പ്രചരണങ്ങളില്‍ ഈ വീഡിയോ ഭാഗികമായി മാത്രമേ കാണിച്ചിട്ടുള്ളൂ.

വീഡിയോയുടെ 4 മിനിറ്റ് 11 സെക്കൻഡ് ദൈർഘ്യമുള്ള മറ്റൊരു പതിപ്പ് ഞങ്ങൾ കണ്ടെത്തി. അതിൽ 2 മിനിറ്റ് 21 സെക്കൻഡ് ടൈംസ്റ്റാമ്പിൽ നമുക്ക് സ്ക്രീനിൽ ഒരു ഡിസ്ക്ലൈമര്‍ കാണാൻ കഴിയും – 

” ഇത് തികച്ചും സാങ്കൽപ്പികമാണ്, വീഡിയോയിലെ എല്ലാ സംഭവങ്ങളും സ്ക്രിപ്റ്റ് ചെയ്തതും ഇതിനായി മാത്രം നിർമ്മിച്ചതുമാണ്. അവബോധം എന്ന   ഉദ്ദേശമല്ലാതെ ഈ വീഡിയോ ഏതെങ്കിലും തരത്തിലുള്ള പ്രവർത്തനത്തെ പ്രോത്സാഹിപ്പിക്കുകയോ ഏതെങ്കിലും തരത്തിലുള്ള ആചാരങ്ങളെ അപകീർത്തിപ്പെടുത്തുകയോ ചെയ്യുന്നില്ല. ജീവിച്ചിരിക്കുന്നവരോ മരിച്ചവരോ ആയ ഏതെങ്കിലും വ്യക്തിയുമായോ അല്ലെങ്കിൽ ഏതെങ്കിലും യഥാർത്ഥ സംഭവവുമായോ ഉള്ള സാമ്യം തികച്ചും യാദൃശ്ചികമാണ്.”

തുടര്‍ന്ന് ഈ പേജിന്‍റെ അഡ്മിനായ അജയ് വർമ്മയെ ഞങ്ങൾ ബന്ധപ്പെട്ടു. സമൂഹത്തിൽ അവബോധം പ്രചരിപ്പിക്കുന്നതിനായാണ് വീഡിയോകൾ ചിത്രീകരിക്കുന്നതെന്ന് ഞങ്ങളോട് പറഞ്ഞു. വീഡിയോയിൽ കാണുന്ന അഭിനേതാക്കളായ പർമാനന്ദ്, സുശീൽ, പങ്കജ് എന്നിവരാണ് വീഡിയോ റെക്കോർഡ് ചെയ്തത്. സമൂഹത്തിൽ അവബോധം പ്രചരിപ്പിക്കുക എന്ന ഉദ്ദേശത്തോടെയാണ് അദ്ദേഹം ഈ വീഡിയോകൾ നിർമ്മിക്കുന്നത്.

ബോധവൽക്കരണം എന്ന് ഡിസ്ക്ലൈമര്‍ നല്‍കി മറ്റ് നിരവധി വീഡിയോകൾ ഈ പേജിൽ അപ്‌ലോഡ് ചെയ്തിട്ടുണ്ട്. അതിൽ വൈറലായ വീഡിയോയിൽ കാണുന്ന അതേ അഭിനേതാക്കളെ നമുക്ക് കാണാൻ കഴിയും. ഈ അഭിനേതാക്കളുടെ മുഖ സാമ്യത്തിന്‍റെ ചിത്രം നിങ്ങൾക്ക് ചുവടെ കാണാം.

നിഗമനം 

വിളകളില്‍ വിഷം നേരിട്ട് കുത്തിവയ്ക്കുന്ന വീഡിയോ യഥാർത്ഥമല്ല,  സ്ക്രിപ്റ്റ് ചെയ്തതാണ്. ഇത് യഥാര്‍ത്ഥ സംഭവമാണെന്ന് തെറ്റിദ്ധരിച്ച് പലരും പങ്കുവയ്ക്കുകയാണ്. ബോധവൽക്കരണം നടത്തുന്നതിനായി ചിത്രീകരിച്ച ഈ വീഡിയോയില്‍ നിന്നും ഡിസ്ക്ലൈമര്‍ ഉള്ള ഭാഗം  നീക്കം ചെയ്യുകയും ഇത് യഥാർത്ഥ സംഭവമായി പ്രചരിപ്പിക്കുകയും ചെയ്യുകയാണ്.

ഞങ്ങളുടെ ഏറ്റവും പുതിയ ഫാക്റ്റ് ചെക്കുകള്‍ ലഭിക്കാനായി ഞങ്ങളുടെ Telegram ചാനല്‍ Fact Crescendo Malayalamഈ ലിങ്ക് ഉപയോഗിച്ച് സബ്സ്ക്രൈബ് ചെയുക.

Facebook | Twitter | Instagram | WhatsApp (9049053770)